Benvenuti nel regno di Re Cappelletto

Oggi vi parlo di una grande scoperta: ce la racconta il poeta Alfredo Zerbini. Vediamo chi tra voi la sa tradurre al volo! La Scoperta ad j Anolén è la “vera” storia della nascita del piatto simbolo della cucina parmigiana: gli Anolini, scritta nell’autentico dialetto dei borghi dell’Oltretorrente e della Ghiaia da Alfredo Zerbini, uno dei più grandi poeti dialettali parmigiani del Novecento.

  Landrén, coll sbofigon ch’a fava al cögh, al tarnegäva ad grass, aj e burnierbi; al s’inzotläva tant ataca al fogh che ancora inco l’è d’moda coll proverbi ch’a diz acsì: “L’è nett come ‘l cögh Landrén ch’al spargnacläva il plugghi col mes’cén”. Cla grimma äd la Tiberta, so mojera, la vreva ch’al s’laviss, ch’al s’fiss tondär; mo ‘d tgnirel nett ‘n gh’era la manera, e quindi l’era tutt un brangognär: par cost, Landrén, al vreva un ben da mat soltant a Ciccio, ch’l’era po äl so gat. Ste Ciccio l’era vec e sensa dent, però al s’mantgniva semp’r un bel soriàn parchè Landrén, povrètt, lera passient mo fina al pont äd färegh i gnagnàn. Un gioren, ansi, e propria äl di ‘d Nadäl, al pennsa ad färegh di gnagnàn speciäl. Al s’metta in bocca pan, formaj, stracot, pevér e säl, e biassa tutt insomma. Al gh’ n’äva fat in pressia un mez baslot, né dur né mol, e liss pu che na crema. Mo quand par tgnirla insomma al gh’à miss n’ov, al tasta e ‘l fa: – Mo tò che savor noéuv!- Un savor noéuv, picant, ch’al stussicäva, n’armes’ciansen’na rära, delissiosa; e li sul colp, intantch’al ja mesdäva, agh sälta in menta ad far na bela cosa. A vreva dir che inveci äd däria al gat al völ fär quel äd bon mäi vist né fat. Fa fär da so mojera na fojäda con dj ov in abondansa e fior ‘d faren’na, e dop con tutt’cla roba profummäda provì a indvinär un po cosa al comben’na? Fa tant tordlén rotond, picén piceni, e inventa äd sana pianta j Anolén! Quand al j à miss in tävla, al so padròn al gh’à dmandè: – Cos’è sta novità? – – L’è na mnestren’na in brod ad me invensiòn – a fa Landrén – Ch’al senta che bontè! E quand al n’arà fat na sgaroläda, Don Filipp, ch’al gh’beva sora na turäda. – Don Filipp, apen’na miss al primm in bocca, al va in fumana e ‘l sälta come un demonni; al guärda al cögh, al ridda, al smania, al s’tocca, e ‘l dmanda s’l’è li desd o s’l’è ‘n insonni. E int un moment al n’à sbafè tri tond … s’al ne n’aviss magné da dop ch’l’è al mond. Insomma, lu al ne stäva pu int la pela. – Mo che delissia! Mo che bocon da pret! J ò sempör ditt ch’at manca na rodela, e inveci at si na siensa, un cögh perfet! Beva, Landrén! E beva an’ti Toberta! Bisogna festegiär sta gran scoperta! – Landrén l’era ragiant, al se stimäva cme s’ l’aviss fat al Dom o la Pilota; e la Tiberta intant la tracanäva alägra e frissa pu che na gionvota. S’ j avissev vist, tutt tri, dopo mez’ora che rassa ad na cagon’na a gh’è gnu fora! Don Filipp, ch’al pärla sempre dj Anolén al dmanda la ricetta äd ste portent; e la Tiberta, brassè su Landrén, la gh’diz, cardend äd färgh un compliment:  “Mo dighel, gioia, digghel ch’at j è fat con chi gnagnàn ch’a t’è biassè pral gat!” (Alfredo Zerbini, Parma 1895-1955, a cura del “Centro Studi Galleggiante da Brodo”, Fondazione “Maisazzi” G. Pellinghelli www.provincialgeographic.it